Coregal, unha aposta firme pola sostibilidade

Antonio Pena, xerente de Coregal

As empresas temos o deber moral de dar resposta ás necesidades da sociedade. E un dos grandes retos da nosa é, sen ningunha dúbida, a conciliación da actividade económica e produtiva coa sostibilidade, para non comprometer o futuro das próximas xeracións.

Sostebilidade que en Coregal situamos nun lugar predominante no noso modelo de xestión, como un dos nosos piares fundamentais sobre os que construímos a estratexia do noso centro especial de emprego. Porque para que a sostebilidade sexa permeable en todas as decisións empresariais debe estar exactamente aí, no centro.

En Coregal entendemos e traballamos a sostibilidade dende un triple enfoque: social, ambiental e económico. O enfoque social atende á inclusión laboral de persoas con discapacidade, que é o noso propósito e a nosa razón de ser, do mesmo xeito que o é para o Grupo Empresarial ao que pertencemos. O enfoque ambiental céntrase en medir que impacto ten a nosa empresa no medio ambiente e que liñas de traballo estamos a desenvolver para melloralo. E, por último, o enfoque económico, entendendo que os bos resultados son a clave para conseguir xerar cada vez máis oportunidades de vida para as persoas.

A actividade de Coregal, que dá emprego a máis de 190 persoas, das que máis do 80% teñen algún tipo de discapacidade, foi crecendo nos últimos anos ata terminar 2021 transportando máis de 60.000 toneladas de residuos, xestionando directamente máis de 45.000 e recuperado máis do 90% de papel, cartón e plástico para  reintroducilo no ciclo produtivo, evitando deste xeito a sobre explotación dos recursos naturais.

Un proxecto de impacto social que nos ilusiona, do mesmo xeito que o fai a folla de ruta de COGAMI Empresarial en materia de sostibilidade. Estamos a analizar que necesidades vai ter a sociedade no futuro máis próximo para poder ofrecer as mellores solucións para unha xestión eficiente dos residuos. Pero, ademais, estamos a levar a cabo alianzas estratéxicas con grandes empresas, organizacións e concellos que comparten con nós valores e boas prácticas de xestión empresarial.

A sociedade demanda empresas responsables. En Coregal levamos anos aceptando o reto e demostrando que é posible unha forma diferente de facer empresa, poñendo ás persoas no centro. Para min é unha enorme satisfacción traballar nun grupo empresarial con valores, con alma, que compatibiliza o resultado económico cun propósito moito maior, construír un mundo mellor, máis xusto e habitable para todas as persoas.