COGAMI Empresarial presente en ExpoMunicipal, a primeira feira de produtos e servizos para concellos

Co obxectivo de poñer en contacto ás administracións locais coas empresas, o recinto feiral de Silleda celebrou a primeira edición da feira ExpoMunicipal, un punto de encontro para que as administracións locais coñezan as solucións que ofrecen as empresas para satisfacer as necesidades da cidadanía e incrementar a súa calidade de vida.

Dixardín, Coregal, Combina Social e Grafinco foron catro dos dez centros especiais de emprego de iniciativa social de COGAMI Empresarial que asistiron a esta feira, que acolleu 520 empresas de 24 países con programacións paralelas de actividades e demostracións. As catro iniciativas presentaron os seus produtos e servizos relacionados cos sectores de medio ambiente, paisaxismo, xestión e tratamento de residuos, mobiliario urbano, limpeza municipal, outsourcing, accesibilidade e impresión.

ExpoMunicipal converteuse nunha cita esencial para que os municipios e entidades territoriais puidesen coñecer todas as solucións que as empresas ofrecen para satisfacer as necesidades dos seus habitantes e cumprir coa Axenda 2030. Ademais, serviu como foro de reflexión e debate sobre temas de máxima actualidade no ámbito da xestión municipal.