Reforzamos o noso compromiso coa sostibilidade uníndonos á Alianza Galega polo Clima

En COGAMI Empresarial damos un novo paso na aposta por un modelo de desenvolvemento sostible, por iso nos adherimos á Alianza Galega polo Clima, unha iniciativa que promove a Xunta de Galicia para mobilizar a axentes sociais e empresariais contra o cambio climático. Esta adhesión reafirma o noso compromiso coa sostibilidade e co impulso de accións que fomenten a eficiencia enerxética, a redución de emisións e a economía circular.

Como parte desta alianza, subscribímonos ao Memorando da Alianza Galega polo Clima, documento que recolle principios e obxectivos comúns para facer fronte ao cambio climático. Entre as medidas que se impulsan destacan a transición cara a modelos produtivos máis sostibles, a optimización do uso de recursos e a implantación de boas prácticas ambientais en todos os ámbitos de actividade.

Esta adhesión está en consonancia co Plan Estratéxico 2023-2026 de COGAMI Empresarial, que inclúe a sostibilidade como eixo fundamental. Levamos implementadas distintas accións para minimizar o impacto ambiental na nosa actividade, apostando por modelos de produción responsables e por unha xestión eficiente dos recursos. Agora, ao formar parte da Alianza Galega polo Clima, poderemos colaborar con outras entidades, intercambiar boas prácticas e sumar esforzos para avanzar cara a un futuro máis sostible.